Gen 8 | NdeIBE | STEP | Kodwa uNkulunkulu wamkhumbula uNowa lazo zonke izinyamazana zeganga lezifuyo ezazilaye emkhunjini, wasethumela umoya emhlabeni, amanzi asededa.

Genesis 8

1 Kodwa uNkulunkulu wamkhumbula uNowa lazo zonke izinyamazana zeganga lezifuyo ezazilaye emkhunjini, wasethumela umoya emhlabeni, amanzi asededa. 2 Manje imithombo yolwandle lamasango amanzi asemazulwini kwasekuvaliwe, lezulu laselisile emkhathini.

3 Amanzi etsha kancane kancane emhlabeni. Ekupheleni kwezinsuku ezilikhulu lamatshumi amahlanu amanzi ayesetshile, 4 kwathi ngosuku lwetshumi lesikhombisa lwenyanga yesikhombisa umkhumbi wayakuma phezu kwezintaba zase-Ararathi. 5 Amanzi aqhubeka esetsha kwaze kwaba yinyanga yetshumi, kwathi ngosuku lokuqala lwenyanga yetshumi iziqongo zezintaba zaqala ukubonakala.

6 Ngemva kwezinsuku ezingamatshumi amane uNowa wavula iwindi ayelenzile emkhunjini 7 wathuma iwabayi, labe lilokhu liphapha lihamba liphinde libuye amanzi aze atsha emhlabeni. 8 Wasethuma ijuba ukuthi abone langabe amanzi ayesetshile emhlabathini. 9 Kodwa ijuba laswela indawo yokubeka unyawo ngokuba kwakulamanzi yonke indawo phezu komhlaba; ngakho labuyela kuNowa emkhunjini. Wakhupha isandla walamukela ijuba walibuyisa kuye emkhunjini. 10 Walinda okwezinye izinsuku eziyisikhombisa waphinda walithuma ijuba lisuka emkhunjini. 11 Kwathi ijuba selibuya kuye ntambama, laliphethe ngomlomo walo ihlamvu lesihlahla se-oliva elalisanda kukhiwa! UNowa wasesazi ukuthi amanzi ayesehlile kakhulu emhlabeni. 12 Walinda okwezinye izinsuku eziyisikhombisa walithuma ijuba njalo, kodwa ngalesi isikhathi kalisabuyanga kuye.

13 Ngosuku lokuqala lwenyanga yokuqala yomnyaka wamakhulu ayisithupha lamunye wokuphila kukaNowa, amanzi ayesomile emhlabeni. Yikho uNowa wasesusa uphahla lomkhumbi esebona ukuthi iphansi lomhlabathi laselomile.

14 Ngosuku lwamatshumi amabili lesikhombisa lwenyanga yesibili umhlabathi wawusuwomile qha. 15 UNkulunkulu wasesithi kuNowa, 16 “Phuma emkhunjini, wena lomkakho, lamadodana akho labomkawo.

17 Khupha yonke into ephilayo olayo – izinyoni, izinyamazana lazo zonke izinanakazana ezihuquzela emhlabathini – ukuze zande emhlabeni, zizale zande ngobunengi kuwo.”

18 Yikho uNowa wasephuma, kanye lamadodana akhe, lomkakhe kanye labomkawo.

19 Zonke izinyamazana kanye lezinanakazana ezihuquzela emhlabathini lazo zonke izinyoni – yonke into enyakazayo emhlabeni – kwaphuma emkhunjini, ngemihlobo kulandelana.

20 UNowa wasesakhela uJehova i-alithare, wathatha ezinye izinyamazana lezinyoni ezihlanzekileyo wanikela imihlatshelo yokutshiswa phezu kwalo. 21 UJehova wahotsha uqhatshi olumnandi wathi enhliziyweni yakhe: “Kangisayi kuphinda ngiwuthuke njalo umhlabathi ngenxa yomuntu, lokuba izinkanuko zenhliziyo yakhe zimbi kusukela ebuntwaneni bakhe. Njalo kangisoze lanini ngiphinde ngibhubhise zonke izidalwa eziphilayo, njengalokhu engikwenzileyo.

22 “Nxa umhlaba ulokhu usekhona, isikhathi sokuhlanyela lesokuvuna, umqando lokutshisa, ihlobo lobusika, imini lobusuku kakusoze kwacina.”